Plantun de Prouvènço

Pèr coumpara dos planto d'encò nostre

Teucrium lucidum & Pinguicula vulgaris

Teucrium lucidum

Lamiaceae Labiaceae

Nom en français : Germandrée brillante.

Descripcioun :
Lou calamandrié-lusènt sèmblo proun à l'erbo-dóu-pichot-chaine. Pamens èi mai grand, sènso péu (aleva sus li petalo), emé de fueio lusènto. La fueio peréu èi pas descoupado dóu meme biais. Trachis dins li relarg ensouleia de roucaio, roucas de basso e mejano mountagno.

Usanço :
Couneissèn pas d'usanço particuliero pèr aquelo planto. Ei bessai vertuous dóu meme biais que lou pichot-chaine. Escriéure au site se n'en sabès mai.

Port : Pichoto planto lignouso
Taio : 20 à 60 cm
Fueio : óupousado
Tipe bioulougico : Emicriptoufite
Cicle bioulougico : Planto renadivo

Gènre : Teucrium
Famiho : Lamiaceae
Famiho classico : Labiaceae

Ordre : Lamiales

Coulour de la flour : Roso
Petalo : irreguliero
Ø (o loungour) flour : Pancaro entresigna
Flourido : Estiéu

Sòu : Ca
Autour basso e auto : Pancaro entresigna
Aparado : Noun

Liò : Mountagno mejano - Esboudèu - Roucaio
Estànci : Subremediterran à Subaupen
Couroulougi : Pancaro entresigna
Ref. sc. : Teucrium lucidum L., 1759

Erbo-grasso

Pinguicula vulgaris

Lentibulariaceae

Noms en français : Grassette commune, Langue-d'oie.

Descripcioun :
L'erbo-grasso trachis en mountagno, sus cauquié, dins li riéusset e àutri relarg bagna. Es uno planto carnivoro que pòu aganta de bestiouno emé si fueio pegouso à bord envertouia. Se destrìo de si cousino, mens coumuno, que si flour soun plato emé uno taco blanco sus li petalo que li bord soun pas gaire net.

Usanço :
Li fueio soun couneigudo pèr caia lou la, parié qu'en Suèdo se n'en servien. S'adoubo un sirop purgatiéu que sèrt peréu pèr gari contro lis escarto de pèu. Aro s'atrobo en fitouterapìo pèr sougna lou tussi (espetouranto), li mau de garganto e apasima li nèrvi. S'adoubo en tisano, 20 g de fueio emé de mèu e de jus de limoun. Pamens la planto èi proutejido dins d'ùni relarg.